Кенжебек Жанәбілов

Ата-ана аманаты

Тәңiрден сұрағаным,
Елжiреп жұбанарым.
Бақытым балаларым,
Қызықтап қуанарым.

Байлығым балаларым,
Бар болсын саналарың.
Сыйласып жүрiңдершi,
Cуымай араларың.

Қайырмасы:
Айтатын аманатым,
Шықпасын жаман атың.
Жүректе болсын әр кез,
Тәуба мен қанағатың.
Жайнасын тiрлiктерiң,
Көңілді кiрлетпегiн.
Бағасыз байлықта сол,
Жарасса бiрлiктерiң.

Сөгiлмей iргелерiң,
Болыңдар iргелi елiм.
Тағдырдың дауылдары,
Ұмытпа бiр келерiн.

Сын сәтте ауырсынбай,
Сабыр қыл сағың сынбай.
Демеп жүр бiр бiрiңдi,
Бiр туған бауырсың-ай.