Айганыш Абдиева

Жар салуу (Жар-жар)

Той башталып шаң менен,
Жуптун көркү пар менен
Уулуңуздар келатат,
Тандап алган жары менен.

Сыйлуу конок кашында,
Бүгүн берсин асыл баа.
Ийилип койсун эки жаш,
Сүйүнүп келген жакынга.

Бабасы мыкты дедирген,
Ак батасы төгүлгөн.
Калкалаган ар дайым,
Баркы тоодой көрүнгөн.
Ата-журт үчүн бир салам!

Жандап жүргөн тирегиң,
Дайым айткан тилегин.
Жашооң өйдө-төмөндө,
Жардам берип сүйөөрүң.
Тай журтуң үчүн бир салам!

Кубанып келген тоюңа,
Бекем кыскан бооруна.
Күндө тилек кылышкан,
Миң жыл жакын болууга.
Кудалар үчүн бир салам!

Көңүл толкуп деңиздей,
Пейили жайнап жемиштей.
Бакыт сунган бир өсүп,
Бала кезден эгиздей.
Досторуң үчүн бир салам.

Ынтымактуу үй-бүлө деп
Айлангыла үлгүгө
Кылыгына баланын
Балкып өмүр сүргүлө

Бек кармашып колуңар,
Куттуу болсун тоюңар
Кыргыз санын көбөйтүп,
Ачык болсун жолуңар
Куттуу болсун тоюңар