Asadbek Rahmatullayev

Onam kelin topdi

Onam kelin topdi - yoqdi o’sha qiz,
Ayro tushdi endi yo’lim siz bilan.
Yig’lasangiz yig’lang, endi farqi yo’q,
Endi ko’rishmaymiz, gulim, siz bilan.

Sovchilarim borsa, nozlar qilgansiz,
Osmondagi bitta oyman degansiz,
Kechib ketolmaydi deb o’ylagansiz,
Endi ko’rishmaymiz, gulim, siz bilan.
Ko’zlaringiz nega yoshga to’lyapti?
Menga baxtlar tilang yorug’ yuz bilan.
To’yimga borarsiz, aytgani keldim,
Endi ko’rishmaymiz, gulim, siz bilan.

Ortingizdan yurib rosa tolgandim,
Qadrim bilmadingiz, yaxshi ko’rgandim,
Bag’ritoshlikni ham sizdan o’rgandim,
Endi ko’rishmaymiz, gulim, siz bilan.
Xafa qilgan bo’lsam, uzr so’rayman,
Baxtimiz kulmadi sizday qiz bilan.
Ishqingizda kuygan Qodir yo’q endi,
Endi ko’rishmaymiz, gulim, siz bilan.